नाशिक शहरात दिवसेंदिवस गुन्हेगारीच्या घटनांमध्ये प्रचंड वाढ होत असल्याने सर्वसामान्य नागरिकांमध्ये भीतीचे वातावरण पसरले आहे. अशातच आता नाशिकच्या इंदिरानगर परिसरामध्ये एका तरुण मुलीची भररस्त्यात निर्घृण हत्या करण्यात आल्याची धक्कादायक घटना समोर आली आहे. या थरारक घटनेमुळे संपूर्ण परिसरात प्रचंड खळबळ उडाली असून शहराच्या कायदा व सुव्यवस्थेवर पुन्हा एकदा प्रश्नचिन्ह उपस्थित झाले आहे.
रात्री १०:३० वाजता घडला थरार
मिळालेल्या प्राथमिक माहितीनुसार, ही घटना नाशिकच्या इंदिरानगर येथील वनसंपदा सोसायटीतील गार्डनजवळ रात्री १०:३० वाजेच्या सुमारास घडली. वैष्णवी अनिल आवारे असे मृत तरुणीचे नाव आहे. वैष्णवी ही मूळची जळगाव जिल्ह्यातील अमळनेर येथील रहिवासी असून ती नाशिकमध्ये वनसंपदा सोसायटीत पेईंग गेस्ट (PG) म्हणून राहत होती.
प्रेमप्रकरणातून हत्या झाल्याचा संशय
रात्रीच्या वेळी वैष्णवी सोसायटीजवळून जात असताना, एका माथेफिरू तरुणाने तिच्यावर अचानक हल्ला केला. त्याने धारदार चाकूने वैष्णवीवर सपासप वार केले. हा हल्ला इतका भीषण होता की, वैष्णवी रक्ताच्या थारोळ्यात जमिनीवर कोसळली. ती निपचित पडल्यानंतर हल्लेखोर घटनास्थळावरून फरार झाला.
वैष्णवी रस्त्याच्या कडेला रक्ताच्या थारोळ्यात पडलेली पाहून स्थानिक नागरिकांनी तातडीने याची माहिती पोलिसांना दिली. माहिती मिळताच इंदिरानगर पोलिसांनी (Indiranagar Police) घटनास्थळी धाव घेतली.
पोलिसांकडून फरार आरोपीचा शोध सुरू
पोलिसांनी घटनास्थळाचा पंचनामा करून वैष्णवीचा मृतदेह ताब्यात घेतला आणि तो शवविच्छेदनासाठी जिल्हा रुग्णालयात पाठवला आहे. हा संपूर्ण प्रकार एकतर्फी प्रेमप्रकरणातून घडला असावा, असा प्राथमिक संशय पोलिसांनी व्यक्त केला आहे.
याप्रकरणी इंदिरानगर पोलीस ठाण्यात गुन्हा दाखल करण्यात आला असून फरार आरोपीचा शोध घेण्यासाठी पोलिसांची पथके रवाना झाली आहेत.
